النادي الأهلي وأحلام لم تتحقق ( للمصريين فقط )

طبعا كلنا شفنا الهزيمة النكراء التي تعرض لها النادي الأهلي في النهائي أمام النجم الساحلي ، لكن طبعا دايما بنقول الحمد لله في السراء والضراء ، وأنا لا أقول هذا الكلام بمناسبة إني أهلاوي إنما أنا مصري والأهلي كان بيمثل مصر ، يعني لو الزمالك هو اللي اتغلب كان هيبقى شعوري نفس الشعور وربنا وحده هو اللي أعلم .

لكن خلينا نتكلم بصراحة وموضوعية وبعيدا عن التعصب ، أنا فعلا كنت حاسس إن الأهلي ما كانش هيكسب الناهردة ، لعدة أسباب أهمها إن النادي الأهلي السنادي مش هو النادي الأهلي بتاع السنة اللي فاتت أو اللي قبليها ، يعني مستواه مش هو المستوى بتاعه اللي إحنا متعودين عليه ، يعني السنة اللي فاتت كان أبو تريكة قمة في الأداء والنشاط وصناعة الألعاب والمهارات وكان محمد عبد الوهاب الله يرحمه موجود وبيتحفنا بلعبه ، وكان شوقي ممشي خط الوسط على عجين ما يلخبطوش ، وكان فلافيو قناص وماكانش حد بيقطع منه كورة من كتر قوته البدنية واحتفاظه السليم بالكرة ووائل جمعة والنحاس كانوا في قمة إنتاجهم الرياضي وغيره وغيره ، أما السنادي فأنا عايز أي عضو يعمل مقارنة ، يعني بركات العنصر الفعال كان غايب والأهلي نتائجه السنادي مش ولا بد وناس كتير فورمتها نزلت ، ده غير إن حسني الفقر كان موجود ( وأنا شايف إنه أكبر سبب لخسارة الأهلي ) .

ولو لاحظنا إن النجم الساحلي السنة اللي فاتت ما كانش فيه اللعيبة دي خالص ، وإنه رمم صفوفه بلعيبة جداد وصغيرين وأصحاب موهبة ، والكلام ده حصل بعد الخسائر التي كان بيتعرضلها ، وحط هدف قدامه إنه يروح اليابان ، لكن الأهلي بقاله سنتين أو أكتر في مكاسب ومش حاسس بمرارة الناس اللي كانت بتتغلب حواليه ، والمرارة دي كانت السبب في إن الفرق المغلوبة تحسن أداءها ولعيبتها عشان تحقق أهدافها في اليابان .

أرجع وأقول برضه الأهلي لو كان غلب النجم وراح اليابان ماكانش هيعمل حاجة هناك ، لأن الأهلي السنادي أضعف من أهلي السنة اللي فاتت ، لذلك كان لابد ليه من كبوة حصان أصيل عشان يفوق ويصحصح لنفسه ويغير مديره الفني ويستغنى عن بعض لعيبته الكبار في السن نسبيا ، ويبطل شراء لعيبة مالهاش لازمة وينمي ويطور ويرمم صفوفه بلعيبة صغيرة في السن زي ما كل الفرق بتعمل .

» تاريخ بطل القرن (( النادي الأهلي )) وكل شيئ عنة .. هنا فقط
» ملف شامل عن لا عبي النادي الاهلى بطل افريقيا فى كاس الاندية باليابان 2008
» وفاه الحاج سيد متولى رئيس النادي المصري البورسعيدي, انا لله وانا اليه راجعون